តោះ ! មកដឹងឱ្យកាន់តែច្បាស់ពីកម្មវិធីថ្មី I Can See Your Voice Cambodia ថា តើប្លែកយ៉ាងណា ?
I Can See Your Voice ជាកម្មវិធីទូរទស្សន៍ដែលកំពុងលេចធ្លោលើពិភពលោក ជាពិសេសនៅអាស៊ីយើងនេះតែម្តង ។ ហើយអ្វីដែលលោកអ្នកកំពុងទន្ទឹងរង់ចាំជាពិសេសអ្នកដែលធ្លាប់ទស្សនាកម្មវិធីនេះរបស់បរទេសហើយចង់ឲ្យកម្មវិធីដ៏ពិសេសនេះមកកាន់ប្រទេសកម្ពុជានោះ ពេលនេះក្តីស្រមៃបានក្លាយជាការពិតហើយ គឺស្ថានីយទូរទស្សន៍ ហង្សមាស បានទិញសិទ្ធផ្តាច់មុខសម្រាប់ផលិតនៅក្នុងប្រទេសកម្ពុជាដើម្បីបម្រើចំណីអារម្មណ៍ថ្មីដល់ទស្សនិកជនដែលតែងតែគាំទ្រប៉ុស្តិ៍ហង្សមាស និង រស្មីហង្សមាស ផងដែរ ។
I Can See Your Voice គឺជាកម្មវិធីកម្សាន្តមួយដែលក្នុងកម្មវិធីតម្រូវឲ្យមានកំពូលអ្នកវិភាគចំនួន ៥ រូប កំពូលតារាចម្រៀងកិត្តិយស ១ រូប ជាមួយនឹងអ្នកចម្រៀងអាថ៍កំបាំងលាក់សំឡេងចំនួន ៧ រូប ដែលមានទាំង សំឡេងពីរោះ និង សំឡេងអាក្រក់ស្តាប់ផងដែរ ។ សម្រាប់កម្មវិធីដ៏ប្លែកមួយនេះតម្រូវឲ្យកំពូលអ្នកវិភាគទាំង ៥ រូប បញ្ចេញទស្សនផ្តល់យោបល់ដល់កំពូលតារាចម្រៀងឲ្យជ្រើសហៅអ្នកចម្រៀងអាថ៍កំបាំងលាក់សំឡេងឡើងបកស្រាយបទចម្រៀងនៅលើវេទិកាបង្ហាញការពិត ថាតើមានសំឡេងពីរោះ ឬយ៉ាងណា ? កម្មវិធីក៏នឹងបង្ហាញតំរួយដល់កំពូលអ្នកវិភាគ និង តារាចម្រៀងកិត្តិយសដើម្បីជាជំនួយដល់ការទស្សន៍ទាយ ដូចជារូបសម្បត្តិរបស់បេក្ខជនអ្នកចម្រៀងលាក់សំឡេង ការច្រៀងធ្វើមាត់ត្រាប់តាម (Lip Sync) និង សំឡេងច្រៀងគោកដ៏ខ្លីផងដែរ ។
នៅពេលនោះកំពូលអ្នកវិភាគនឹងក្លាយជាអ្នកកំពូលកូរធ្វើឲ្យកម្មវិធីទាំងមូលពោរពេញទៅដោយសំណើចសើចសប្បាយជាក់ជាពុំខាន ។ កម្មវិធីនឹងជម្រុះអ្នកចម្រៀងអាថ៍កំបាំងលាក់សំឡេងទាំង ៧ នាក់ រហូតដល់សល់ម្នាក់ចុងក្រោយ ហើយបើសិនអ្នកចម្រៀងអាថ៍កំបាំងលាក់សំឡេងចុងក្រោយមានសំឡេងអាក្រក់ស្តាប់នោះ កម្មវិធីនឹងផ្តល់នូវប្រាក់រង្វាន់ចំនួន ១ លានរៀល តែបើនៅសល់ចុងក្រោយអ្នកដែលមានសំឡេងពីរោះ នោះគេនឹងមានឱកាសបានឡើងបកស្រាយចម្រៀងជាមួយកំពូលតារាចម្រៀងកិត្តិយសនៅលើឆាកតន្ត្រីដ៏ធំផងដែរ ។
រង់ចាំទស្សនាទាំងអស់គ្នាកម្មវិធី I Can See Your Voice Cambodia នឹងមានចាក់ផ្សាយជូនទស្សនានៅថ្ងៃអាទិត្យ ទី១០ ខែកុម្ភៈ ឆ្នាំ២០១៩ ខាងមុខនេះហើយវេលាម៉ោង ៦ ល្ងាច ហើយនៅលើកញ្ចក់ទូរទស្សន៍ហង្សមាស HDTV ដែលកម្មវិធីនេះទទួលបានការឧបត្ថម្ភផ្តាច់មុខពីក្រុមហ៊ុនទូរស័ព្ទ OPPO ៕
