Marcelo បញ្ជាក់ច្បាស់ៗថា លោកនឹងនៅ Real Madrid ដល់ទីបញ្ចប់
ខ្សែការពារស្លាប Marcelo បាននិយាយថា ខ្លួននឹងបន្តលេងឲ្យ Real Madrid ដល់ទីបញ្ចប់។ កីឡាករប្រេស៊ីល បាននិយាយបន្តប្រាប់ទូរទស្សន៍ Real Madrid ថា៖ «ខ្ញុំសប្បាយចិត្តណាស់ជាមួយ Real Madrid។ Real Madrid គឺជាផ្ទះរបស់ខ្ញុំ ហើយកុងត្រាខ្ញុំនៅសល់ពេលជាច្រើនឆ្នាំទៀត។ ខ្ញុំគិតថា វាជារឿងល្អដែលខ្ញុំត្រូវនិយាយឲ្យច្បាស់ៗអ៊ីចឹង ព្រោះកន្លងមកមានពាក្យចចាមអារ៉ាមជាច្រើន។ ខ្ញុំតែងតែប្រឹងប្រែងអស់ពីសមត្ថភាពពេលលេងឲ្យក្លិបមួយនេះ»។
Marcelo បានបន្តទៀតថា ខ្លួននៅតែមានភាពសប្បាយរីករាយបន្តលេងឲ្យក្លិបយក្សអេស្ប៉ាញ ហើយបញ្ជាក់ម្ដងទៀតថា ខ្លួនចង់បន្តលេងឲ្យក្លឹបជាច្រើនឆ្នាំទៀត។ កីឡាកររូបនេះបន្តថា៖ «ខ្ញុំនៅតែមានចិត្តចង់ឈ្នះដូចកាលដែលខ្ញុំ មកលេងនៅក្លឹបនេះ កាលពីអាយុ ១៨ ឆ្នាំអ៊ីចឹង។ ខ្ញុំនឹងបន្តលេងឲ្យក្លឹបរហូតដល់ទីបញ្ចប់»។
ចាប់តាំងពីខែកក្កដាកន្លងមក ពោលគឺនៅពេល Cristiano Ronaldo បានធ្វើការចាកចេញពីក្លឹប Real Madrid ទៅ Juventus មានពាក្យចចាមអារ៉ាមជាច្រើនដែលថា ខ្សែប្រយុទ្ធព័រទុយហ្គាល់រូបនេះ បានព្យាយាមទាក់ទាញមិត្តសម្លាញ់ Marcelo ឲ្យមកចូលរួមជាមួយខ្លួននៅក្លិបអ៊ីតាលី។
គួរបញ្ជាក់ផងដែរថា Marcelo បានចូលរួមជាមួយ Real Madrid កាលពីឆ្នាំ ២០០៧។ ក្នុងរយៈពេលជាង ១០ ឆ្នាំ ដោយបានរួមរស់ជាមួយក្លឹប ។ កីឡាករប្រេស៊ីលរូបនេះ លេងបាន ៤៥៦ ប្រកួត និង ស៊ុតចូល ៣៣ គ្រាប់៕
ដោយ៖ Coura ប្រភព(RMTV)
