២ គ្រាប់ ស៊ីព័រទុយហ្គាល់យប់មិញ ធ្វើឱ្យកូរ៉េខាងត្បូងរំភើបដល់ទឹកភ្នែក ព្រោះបានឡើងវគ្គ ១៦ ក្រុម
នៅវេលាយប់ម៉ោង ១០ ថ្ងៃទី ០២ ខែធ្នូ ឆ្នាំ ២០២២ កីឡដ្ឋានក្នុងប្រទេសកាតា បើទ្វារទទួលជំនួបប្រកួតរវាង កូរ៉េខាងត្បូង និង ព័រទុយហ្គាល់ ក្នុងព្រឹត្តិការណ៍បាល់ទាត់ពិភពលោក FIFA World Cup 2022 ដែលជាលទ្ធផល កូរ៉េខាងត្បូង បានយកឈ្នះទៅលើ ព័រទុយហ្គាល់ ២ ទល់នឹង ១ ធ្វើឱ្យកីឡាករជម្រើសជាតិ និង ប្រជាជនកូរ៉េខាងត្បូងរំភើបចិត្តយ៉ាងខ្លាំងរហូតហូរទឹកភ្នែក។
ក្រោយចប់ការប្រកួត កូរ៉េខាងត្បូង ជាប្រទេសនៅតំបន់អាស៊ីទី ៣ (បន្ទាប់ពីជប៉ុន និង អូស្ត្រាលី) ដែលស្ថិតនៅគ្រុប H ជាមួយព័រទុយហ្គាល់ បានដឹកដៃគ្នាឡើងវគ្គ ១៦ ក្រុមចុងក្រោយ ដោយ ព័រទុយហ្គាល់ ត្រូវទៅប៉ះជាមួយស្វីស ហើយក្រុមអ្នកចម្បាំងកូរ៉េខាងត្បូង ត្រូវប៉ះជាមួយនឹងក្រុមសាំបាប្រេស៊ីល ជាជម្រើសជាតិដែលមានពិន្ទុ FIFA Ranking ចំណាត់ថ្នាក់លេខ ១ លើពិភពលោក។
គួរឱ្យដឹងផងដែរថា ក្រោយជំនួបដ៏ស្វិតស្វាញរយៈពេលប៉ុន្មានសប្ដាហ៍មកនេះ ក្នុងព្រឹត្តិការណ៍បាល់ទាត់ពិភពលោក FIFA World Cup 2022 ១៦ ក្រុមដែលឡើងទៅប៉ះគ្នាមានដូចជា ហូឡង់ អាមេរិក អាហ្សង់ទីន អូស្ត្រាលី ជប៉ុន ក្រូអាត ប្រេស៊ីល កូរ៉េខាងត្បូង អង់គ្លេស សេនេហ្គាល់ បារាំង ប៉ូឡូញ ម៉ារុក អេស្ប៉ាញ ព័រទុយហ្គាល់ និង ស្វីស៕
