មានអ្វីជូនពរអត់! ស្អែកនេះអ្នកចាំទីឆ្នើមរបស់វិសាខា កីឡាករ កែវ សុខសិលា ចូលរោងការហើយ ភរិយាស្អាតណាស់!

អ្នកចាំទីដ៏ឆ្នើមរបស់ក្លិបបាល់ទាត់ វិសាខា គឺកីឡាកររូបសង្ហា កែវ សុខសិលា បានសម្រេចចិត្តលាភាពនៅលីវ ហើយដឹកដៃគូស្នេហ៍សំណព្វចិត្តចូលរោងការតាមប្រពៃណី នៅថ្ងៃទី ១៥ ខែមីនា ឆ្នាំ ២០២៤ ស្អែកនេះ ដោយនៅល្ងាចនេះ អនាគតគូស្វាមីភរិយាថ្មីទាំងពីរ នឹងរៀបចំពិធីសូត្រមន្ត ក្រោមវត្តមានចូលរួមពីសាច់ញាតិបងប្អូន ចាស់ទុំទាំងសងខាង ក៏ដូចជាភ្ញៀវកិត្តិយសជិតឆ្ងាយ។

នៅព្រឹកថ្ងៃសូត្រត្រៀមធ្វើជាកំលោះនេះដែរ កីឡាករបាល់ទាត់ កែវ សុខសិលា បានបង្ហាញទិដ្ឋភាពនៃការរៀបចំរោងមង្គល ផ្កាភ្ញី និង គ្រឿងសង្ហារិមយ៉ាងប្រណីតរួចរាល់បង្ហោះនៅលើ Fb Story ដើម្បីត្រៀមរង់ចាំតែពេលាល្អមកដល់ នឹងរៀបចំកម្មវិធីមង្គលជ័យតែម្ដង។

ងាកទៅមើលសម្រស់អនាគតភរិយារបស់អ្នកចាំទីដៃស្អិតរូបនេះវិញ ពិតជាស្រស់សោភា មិនថាទម្រង់មុខមាត់ ស្នាមញញឹម កម្ពស់កម្ពរ ពិតជាស័ក្ដិសមគ្នាខ្លាំងណាស់។ ក្នុងនោះក៏មានមិត្តភក្ដិ អ្នកលេងបណ្ដាញសង្គម ក៏ដូចជាអ្នកគាំទ្រកីឡាករ កែវ សុខសិលា បាននាំគ្នាសរសេរពាក្យពេចន៍ជូនពរដល់លោក និង អនាគតភរិយាឱ្យស្រឡាញ់គ្នា រស់នៅមានសុភមង្គលយ៉ាងច្រើនព្រោងព្រាតផងដែរ៕

រូបភាព៖ ហ្គិចស៊ែង ហ្គោលសម្អាងការ