អត់ទុកមុខឱ្យភ្ញៀវសោះ! ប្រកួតបើកឆាក Euro យប់មិញ ម្ចាស់ផ្ទះអាល្លឺម៉ង់ បត់តារាងលេង លត់ភ្ញៀវ ស្កុតលែន ៥-១
ព្រឹត្តិការណ៍កីឡាបាល់ទាត់ប្រចាំទ្វីបអឺរ៉ុប UEFA EURO 2024 បានបើកឆាកប្រកួតនៅយប់ឈានចូលថ្ងៃទី ១៥ ខែមិថុនា ឆ្នាំ ២០២៤ ដែលការប្រកួតដំបូងនេះ ម្ចាស់ផ្ទះឥន្ទ្រីដែកអាល្លឺម៉ង់ បត់តារាងលេង លត់ជម្រើសជាតិស្កុតឡែនយ៉ាងចាស់ដៃក្នុងលទ្ធផល ៥ ទល់នឹង ១។
កីឡាករ ដែលបានរកគ្រាប់បាល់ជូនក្រុមជម្រើសជាតិរបស់ខ្លួន ក្នុងការប្រកួតបើកឆាក Euro ២០២៤ យប់មិញនេះ គឺមានកីឡាករ Wirtz ស៊ុតចូលនៅនាទីទី ១០, កីឡាករ Musiala រកគ្រាប់បាល់បាននៅនាទីទី ១៩, Kai Havertz ស៊ុតបានគ្រាប់បាល់ប៉េណាល់ទី នៅនាទី ៤៥+១, កីឡាករ Fullkrug រកបានគ្រាប់បាល់នៅនាទីទី ៦៨ និងកីឡាករ Can បំប៉ោងសំណាញ់ទីចុងតង់ នៅនាទីទី ៩០+៣។
ដោយឡែកនៅនាទីទី ៨៧ ជិតចប់ការប្រកួត កីឡាករអាល្លឺម៉ង់ Rudiger ភ្លាត់ស្នៀតតែតបាល់ចូលទីខ្លួនឯង ជួយឱ្យស្កុតឡែនរកបានមួយគ្រាប់ ក្នុងព្រឹត្តិការណ៍ប្រកួតបើកឆាក Euro 2024 យប់មិញនេះ ខណៈនៅតង់ទី ២ ជម្រើសជាតិស្កុតឡែន លេងតែ ១០ ទល់នឹង ១១ នាក់ ដោយសារមិត្តរួមក្រុមបង្ករកំហុសទទួលបានកាតក្រហមកាលបីតង់ទី ១៕
