គ្រប់ទឹក! ជឿជាក់អង់គ្លេសឈ្នះ រត់វឹងទៅសាក់រូបពាន Euro ដាក់ថាអង់គ្លេសលើកពាន មានអីប្រកួតចប់ផ្ញារជើងតូង
អ្នកគាំទ្រក្រុមជម្រើសជាតិអង់គ្លេសម្នាក់ បានរត់ទៅសាក់រូប អ្នកឈ្នះពានរង្វាន់ Euro 2024 មុនការប្រកួតផ្ដាច់ព្រ័ត្រមកដល់ ដោយក្ដីជឿជាក់ថា ក្រុមជម្រើសជាតិរបស់ខ្លួន នឹងទទួលបានជ័យជម្នះលើក្រុមជម្រើសជាតិអេស្ប៉ាញ។
បុរសម្នាក់ឈ្មោះ Dan Thomas អាយុ ២៩ ឆ្នាំ មកពីក្រុង Swindon ចក្រភពអង់គ្លេស បានទាយថា ក្រុមជម្រើសជាតិរបស់ខ្លួន នឹងយកឈ្នះលើអេស្ប៉ាញ ក្នុងលទ្ធផល ២ ទល់នឹង ១ នៅម៉ោងបន្ថែម ក្នុងការប្រកួតផ្ដាច់ព្រ័ត្រ ដែលធ្វើឡើងនៅក្រុងប៊ែកឡាំង កាលពីយប់រំលងអធ្រាត្រឈានចូលថ្ងៃទី ១៥ ខែកក្កដា ឆ្នាំ ២០២៤ កន្លងទៅ។
តាមការចេញផ្សាយដោយសារព័ត៌មាន BBC បុរសរូបនេះបានរៀបរាប់ថា៖ «ខ្ញុំគិតថាអង់គ្លេសឈានមកដល់វគ្គនេះហើយ ដូច្នេះគ្មានអ្វីត្រូវភ្ញាក់ផ្អើលទៀតនោះទេ។ ខ្ញុំជឿជាក់ខ្លាំងថា វានឹងកើតឡើង។ ខ្ញុំនឹងមិនសាក់នោះឡើយ ប្រសិនខ្ញុំគិតថាវាមិនអាចទៅរួចនោះ»។ លោក Dan Thomas បានសាក់រូបពាន Euro នៅភ្លៅខាងឆ្វេងរបស់លោក ដោយជាងបានចំណាយពេលសាក់ដល់ទៅ ២ ម៉ោងកន្លះឯណោះ។ ជាមួយគ្នានោះដែរ ជាងសាក់របស់លោក ក៏បានប្រាប់លោកដែរថា បើអង់គ្លេសចាញ់ លោកត្រូវពិន័យមិនឱ្យលុបបិទបាំងស្នាមសាក់មួយនេះរយៈពេលយ៉ាងហោចណាស់ ១ ឆ្នាំ។
យ៉ាងណាមិញ អ្វីៗខុសការរំពឹងទុក ភាពជឿជាក់ទាំងប៉ុន្មានត្រូវបានរលាយខ្សុលដូចអំបិល ក្រោយលទ្ធផលចុងក្រោយ អេស្ប៉ាញ បានយកឈ្នះលើអង់គ្លេស ២ ទល់នឹង ១៕
