ពេលនិយាយដល់ឈ្មោះ លោក វ៉ន វីវ៉ា ប្រិយមិត្តភាគច្រើន ប្រាកដជានឹកដល់ការប្រកួតលើសង្វ្រៀនប្រដាល់ដ៏ក្ដៅគគុកមួយមិនខាន ដោយលោកគឺជាអតីតកីឡាករប្រដាល់ដ៏ពូកែ មានទេពកោសល្យ និង មានឈ្មោះបោះសំឡេងមួយរូបក្នុងវិស័យកីឡាមួយនេះ។
យ៉ាងណាមិញ ច្រើនឆ្នាំចុងក្រោយនេះ លោក វ៉ន វីវ៉ា បានបន្សាត់ខ្លួនពីអាជីពកីឡាប្រដាល់នេះច្រើនឆ្នាំមកហើយ ដោយលោកងាកទៅប្រកបរបររកស៊ីលក់ដូររថយន្ត និង មុខរបរផ្សេងៗទៀត តែទោះជាបែបនេះ លោក វ៉ន វីវ៉ា នៅតែមានអ្នកគាំទ្រជាច្រើនចង់ដឹងពីសុខទុក្ខរបស់លោកដដែល។
ពិតណាស់ លោក វ៉ន វីវ៉ា បានរៀបការសាងគ្រួសារយ៉ាងមានសុភមង្គលជាមួយត្រកូលអ្នកកីឡាដូចគ្នា គឺអ្នកនាង ស៊ន ដាវីន បងស្រីបង្កើតរបស់កីឡាការិនីតេក្វាន់ដូ ស៊ន សៀវម៉ី ដោយចំណងអាពាហ៍ពិពាហ៍របស់កីឡាកររូបនេះ និង អ្នកនាង ស៊ន ដាវីន ទទួលបានកូនស្រីដ៏ស្រស់ស្អាត និង គួរឱ្យស្រឡាញ់ ២ នាក់មកហើយ ដោយឡែកថ្មីៗនេះ ភរិយាលោក វ៉ន វីវ៉ា ក៏កំពុងទម្ងន់កូនទី ៣ ផងដែរ។
ក្នុងរយៈពេលភរិយាកំពុងទម្ងន់កូនទី ៣ នេះ លោក វ៉ន វីវ៉ា កាន់តែមើលថែថ្នាក់ថ្នមភរិយាទ្វេដង ជាពិសេសពេលនេះ ប្រពន្ធខ្ទាតធំកាន់តែធំ និង ជិតដល់ពេលឃើញមុខកូន ប្ដីប្រពន្ធអ្នកទាំងពីរកាន់តែរំភើប ចង់ឃើញមុខកូនក្នុងផ្ទៃឆាប់ៗ៕
