មួយគ្រួសារគ្នា ៥ នាក់ ចូលញ៉ាំប៊ូហ្វេគេ កុម្ម៉ង់សាច់អស់ ៦០០ ចាន ដល់បើកកាមេរ៉ាមើល ម្ចាស់ហាងគក់ទ្រូងហួសចិត្ត
គេហទំព័រសារព័ត៌មាន SAYS កាលពីពេលថ្មីៗនេះបានចុះផ្សាយរឿងរ៉ាវហួសចិត្តមួយ ដែលកំពុងពេញនិយមលើអ៊ីនធឺណេតនៅក្នុងប្រទេសម៉ាឡេស៊ី ដោយម្ចាស់ហាងប៊ូហ្វេមួយកន្លែងបានបង្ហោះឱ្យដឹងពីចេតនាអាក្រក់របស់អតិថិជនមួយក្រុមមានគ្នា ៥ នាក់មកញ៉ាំអាហារ ហើយបានកុម្ម៉ង់សាច់អស់ដល់ទៅ ៦០០ ចាន ធ្វើឱ្យម្ចាស់ហាងមានការមិនសប្បាយចិត្ត ប៉ុន្តែពេលបើកកាមេរ៉ាសុវត្ថិភាពមើល ក៏បានដឹងថា អតិថិជនមួយក្រុមនេះគួរតែចាប់បញ្ជូនទៅឱ្យប៉ូលិស។
ម្ចាស់ហាងប៊ូហ្វេមួយនៅ Binluti ក្នុងរដ្ឋ Sarawak នៃប្រទេសម៉ាឡេស៊ី កាលពីពេលថ្មីៗកន្លងទៅបានបង្ហោះលើទំព័រហ្វេសប៊ុករបស់ហាងថា ៖ «ខ្ញុំសុំទោស ប៉ុន្តែខ្ញុំចង់ឱ្យសាធារណៈជនទាំងអស់បានដឹងពីរឿងនេះ ខ្ញុំពិតជាមិនអាចទទួលយកបានទេ ដែលមនុស្សមួយក្រុមនេះបានយកកូនរបស់ពួកគេមកលួចនៅហាង»។ ម្ចាស់ហាងបានឱ្យដឹងថា ហេតុការណ៍នេះបានកើតឡើងកាលពីថ្ងៃទី ៨ ខែតុលា ឆ្នាំ ២០២៣ កន្លងទៅ វេលាម៉ោង ២ និង ៣០ នាទីរសៀល ដែលពេលនោះមានអតិថិជនចំនួន ៥ នាក់ (មនុស្សពេញវ័យ ៣ នាក់ និង កុមារ ២ នាក់) មកទទួលទានអាហារប៊ូហ្វេ ហើយបានកុម្ម៉ង់សាច់ជ្រូក ចំនួន ២៥០ ចាន និង សាច់ចៀម ៣៥០ ចាន និង បានសរុបតម្លៃអស់ ១៦៣.៣ រីងហ្គីត (ប្រមាណជា ៣៥ ដុល្លារ) ក្នុងនោះមនុស្សធំម្នាក់អស់ ៣៩.៤២ រីងហ្គីត (៨.៣២ ដុល្លារ) ក្មេងអស់ ២៦.៨២ រីងហ្គីត (៥.៦៦ ដុល្លារ) ជាមួយនឹងការបញ្ចុះតម្លៃបន្ថែម ៥ ភាគរយទៀត។
យ៉ាងណាមិញ ម្ចាស់ហាងបានឱ្យដឹងបន្ថែមទៀតថា ពេលនោះខាងហាង និង បុគ្គលិកទាំងអស់ហាក់មានអារម្មណ៍ប្លែកណាស់ ព្រោះតុនេះបានកុម្ម៉ង់សាច់ច្រើនណាស់ ដោយការងឿងឆ្ងល់ខ្លាំងពេក ម្ចាស់ហាងក៏បានដើរទៅបើកកាមេរ៉ាសុវត្ថិភាពមើល ស្រាប់តែបានឃើញថា អតិថិជនទាំងនោះបានញ៉ាំសាច់តែបន្តិចទេ ហើយសាច់នៅសល់ទាំងប៉ុន្មានពួកគេបានចាក់វាចូលទៅក្នុងថង់មួយ ប៉ុន្តែអ្វីដែលនឹកស្មានមិនដល់នោះគឺ ពួកគេបានរៀបចំគម្រោងការយ៉ាងល្អ ដើម្បីលួចសាច់ពីហាងនេះ ដោយពួកគេបានឱ្យក្មេងៗលួចដាក់សាច់ចូលទៅក្នុងថង់ប្លាស្ទិកនៅក្រោមតុ ដើម្បីយកសាច់ទាំងនោះទៅផ្ទះ។
បន្ថែមពីលើនេះទៀត ក្នុងការបង្ហោះនោះដែរ ម្ចាស់ហាងក៏បានបង្ហាញការខកចិត្តខ្លាំងណាស់ ចំពោះអតិថិជនមួយក្រុមនោះ ដែលបានបង្រៀនកូនឱ្យធ្វើជាចោរតាំងពីក្មេង ដោយម្ចាស់ហាងបានអះអាងថា ហាងរបស់ពួកគេជាហាងតូចមួយ ហើយពួកគេពិបាកណាស់ ទម្រាំអាចបើកហាងនេះបាន ប៉ុន្តែម្ចាស់ហាងក៏បានសង្ឃឹមដែរថា ក្រោយពីត្រូវគេចាប់បានបែបនេះហើយ ក្រុមគ្រួសារនោះនឹងបញ្ឈប់រាល់សកម្មភាពអាក្រក់របស់ពួកគេ ដើម្បីជាគំរូល្អសម្រាប់កូនៗរបស់ពួកគេ៕
ប្រភព ៖ SAYS
