អាយុជិត ៦០ ឆ្នាំហើយ គ្រូបង្វឹកឆ្នើម The Voice Thailand នៅតែសង្ហា

ជឿជាក់ថាប្រិយមិត្តដែលនិយមតាមដានរឿងភាគថៃមុខជាបានស្គាល់ច្បាស់លោក Kong Saharat តារាចម្រៀង និងសម្តែងជើងចាស់ដែលមានវ័យ ៥៤ មានស្នាដៃរឿងល្បីៗជាច្រើន ជាពិសេសលោកក៏ជាគ្រូបង្វឹកឆ្នើមមួយរូបក្នុងកម្មវិធី The Voice Thailand ផងដែរ។

បើនិយាយពីជីវិតក្រៅសិល្បៈវិញ លោក Kong ហាក់មិនសូវបង្ហាញឱ្យឃើញប៉ុន្មានទេ សូម្បីតែរឿងគូស្នេហ៍ក៏លោកមិនសូវជាបង្ហាញឱ្យគេស្គាល់ ឬក៏និយាយដល់រឿងរៀបការនោះដែរ។

តែទោះមិនសូវបង្ហាញពីជីវិតក្រៅឆាក គេបានរកឃើញថាតារាប្រុសវ័យ ៥៤ ឆ្នាំរូបនេះ គឺជាអ្នកមានទ្រព្យសម្បត្តិមិនធម្មតានោះទេ ដោយថ្មីៗនេះ លោកបានបង្ហាញឱ្យឃើញពីទិដ្ឋភាពក្នុងផ្ទះដែលលោកកំពុងរស់នៅនាពេលបច្បុប្បន្ន គឺថាធំស្កឹមស្កៃ និងមានខ្យល់អាកាសល្អគួរឱ្យចង់រស់នៅណាស់។

ដោយផ្ទះនោះជាប្រភេទវីឡា រចនាម៉ូតសម័យថ្មី ហើយមានទីធ្លាខាងក្រោយជាប់ទន្លេ មានខ្យល់អាកាសបរិសុទ្ធ ហើយលោក Kong បានបន្ថែមឱ្យដឹងថា៖ «ផ្ទះនេះគឺលោករស់នៅមកជាង ២០ ឆ្នាំហើយ ហើយវាជាផ្ទះក្នុងក្តីស្រមៃលោក ដែលមានទំហំ ១៣០ ម៉ែត្រការ៉េ»។

«ដំបូងទីនេះគឺជាដី​ ដែលលោកបានទិញក្នុងតម្លៃជាង ១០ លានបាត (ប្រមាណជាង ២៧ ម៉ឺនដុល្លារ) ហើយក្រោយមកលោកក៏បានចំណាយលុយជាង ២០ លានបាត (ប្រមាណជាង ៥៥ ម៉ឺនដុល្លារ) បន្ថែមទៀតដើម្បីសាងសង់ផ្ទះ។ ហើយខាងក្នុងផ្ទះ គឺមានបន្ទប់ជាច្រើន តាំងពីបន្ទប់សត្វចិញ្ចឹម បន្ទប់ហាត់ភ្លេង និងបន្ទប់ដាក់កង់ជាដើម ព្រោះតែលោកចូលចិត្តជិះកង់ហាត់ប្រាណ ហើយលោកបានទិញកង់ជាច្រើនប្រភេទមកទុកសឹងតែពេញផ្ទះ»៕