ក្រុមសិស្សនៅហុងកុង បង្កើតបានមនុស្សយន្តតូចជាងគេបំផុត រហូតជាប់កំណត់ត្រាពិភពលោក

សិស្សហុងកុងមួយក្រុម បានបង្កើតមនុស្សយន្តតូចជាងគេបំផុត មានកម្ពស់ត្រឹម ១៤.១ សង់ទីម៉ែត្រ ដែលអាចដើរបានដោយជើងពីរ និងថែមទាំងអាចមានចលនាដៃ ស្មា ត្រគាក និង ជង្គង់ ទៀតផង។

ក្រុមសិស្សប្រុសហុងកុងចំនួន ៤ នាក់ ប្រចាំសាលា Diocesan Boys’ School បានបង្កើតមនុស្សយន្តមួយបានដោយជោគជ័យ ដោយមនុស្សយន្តនោះ ថែមទាំងមានទំហំតូចជាងគេបំផុត រហូតជាប់កំណត់ត្រាពិភពលោក។ បើតាមការចេញផ្សាយរបស់សារព័ត៌មាន IFL Science កាលពីថ្ងៃទី ១៦ ខែកុម្ភៈ ឆ្នាំ ២០២៤ កន្លងទៅ បានឱ្យដឹងថា មនុស្សយន្តនោះ មានកម្ពស់ត្រឹម ១៤.១ សង់ទីម៉ែត្រ ដែលកម្ពស់នេះ គឺទាបជាងកំណត់ត្រាពិភពលោកចាស់ចំនួន ១១.៣ មីលីម៉ែត្រ ដែលបង្កើតឡើងដោតបុរសសញ្ជាតិប៉ាគីស្ថានឈ្មោះ Zain Ahmad Qureshi កាលពីឆ្នាំ ២០២២។

បើតាមក្រុមសិស្សដែលបង្កើតមនុស្សយន្តនេះ បានបញ្ជាក់ថា មនុស្សយន្តតូចនេះ អាចដើរ អាចលេងបាល់ អាចរាំ និង ថែមទាំងអាចបញ្ចេញក្បាច់គុនថែមទៀតផង។ គួរបញ្ជាក់ផងដែរថា មនុស្សយន្តតូចបំផុតដែលអាចបំបែកកំណត់ត្រាពិភពលោកបាន គឺទាមទារឱ្យវាអាចដើរជើងពីរ អាចធ្វើចលនាស្មា កែងដៃ ត្រគាក និង ជង្គង់បាន៕