(វីដេអូ) ចិនទម្លាយវីដេអូពីក្នុងរោងចក្រផលិតមនុស្សយន្ត មុខមាត់មានគ្រប់ទម្រង់ ដៃជើង និង កាយវិការដូចមនុស្សពិតៗ

ថ្មីៗនេះ វីដេអូបង្ហាញពីទិដ្ឋភាពក្នុងរោងចក្រផលិតមនុស្សយន្តមួយកន្លែងនាប្រទេសចិន កំពុងធ្វើឱ្យមនុស្សជាច្រើនចាប់អារម្មណ៍ និងបង្ហាញការព្រឺសម្បុរជាខ្លាំង។ វីដេអូនោះដែរ ត្រូវបានឱ្យដឹងថា ថតក្នុងក្រុមហ៊ុន Ex Robots ដែលជាកន្លែងជំនាញក្នុងការផលិតមនុស្សយន្ត ដែលច្នៃចេញឱ្យមានរូបរាងដូចជាមនុស្សពិតៗ សម្រាប់ប្រាស្រ័យទាក់ទងជាមួយមនុស្ស និងបំពេញសេវាកម្មក្នុងសហគមន៍។

តាមវីដេអូដែលចែករំលែកដោយ Evolving AI បានបង្ហាញឱ្យថា នៅជាន់ដែលផលិតមនុស្សយន្តក្នុងក្រុមហ៊ុន Ex Robots នាប្រទេសចិននេះដែរ មានមនុស្សយន្តជាច្រើនរាប់មិនអស់ ស្ថិតក្នុងដំណាក់កាលផ្សេងៗគ្នា ដោយខ្លះមិនទាន់មានរូបរាងពេញលេញ ហើយខ្លះក៏មានរូបរាងពេញលេញ និងអាចបញ្ចេញកាយវិការដូចជាមនុស្សទៀតផង។

គួរបញ្ជាក់ថា ក្រុមហ៊ុន Ex Robots ត្រូវបានបង្កើតឡើងក្នុងឆ្នាំ ២០០៩ និងចាប់ផ្ដើមដំណើរការផលិតមនុស្សយន្តក្នុងឆ្នាំ ២០១៦។ បច្ចុប្បន្ន Ex Robots មានជំនាញផ្ដោតសំខាន់ទៅលើការស្រាវជ្រាវ ការច្នៃ ការបង្កើត ការលក់ និងសេវាបម្រើអតិថិជនដោយប្រើប្រាស់មនុស្សយន្តឆ្លាតវៃរបស់ខ្លួន៕