រមណីយដ្ឋានទន្លេបាទី នៅជិតបង្កើយ តែពុំសូវមានអ្នកទៅលេង
រមណីយដ្ឋានទន្លេបាទី ជារមណីយដ្ឋានទេសចរណ៍វប្បធម៌មួយ ដែលនៅជិតបង្កើយពីរាជធានីភ្នំពេញ ប៉ុន្តែមួយរយៈចុងក្រោយនេះ ដោយសារតែកេរ្តិ៍ឈ្មោះមិនសូវល្អ ហាក់បីដូចជាពុំសូវមានភ្ញៀវទេសចរ ទៅសម្រាកលំហែកាយច្រើនប៉ុន្មានឡើយ ទោះបីជានៅទីនោះមានការរៀបចំយ៉ាងស្រស់ស្អាត និង មានរបៀបរៀបរយជាងមុនក្តី ។
រមណីយដ្ឋានទន្លេបាទីនេះ ស្ថិតនៅក្នុងភូមិថ្នាល ឃុំក្រាំងធ្នង់ ស្រុកបាទី ខែត្រតាកែវ មានចម្ងាយជិត ៤០ គីឡូម៉ែត្រ ពីទីក្រុងភ្នំពេញ តាមផ្លូវជាតិលេខ ២ ឬ ក៏តាមផ្លូវ ជើងឯកទៅរង្វង់មូលគួរស្រូវក៏បាន ។
រមណីយដ្ឋាននេះគឺជាបឹងមួយ ដែលមានទឹកថ្លាឆ្វេងទាំងរដូវប្រាំង និង រដូវវស្សា ដែលភ្ញៀវទេសចរទាំងឡាយអាចជួលតូបនៅមាត់ទឹកអង្គុយលេងកម្សាន្ត ឬ ក៏ស្ទូចត្រីជាដើម ។
ក្រៅពីមានបឹងយ៉ាងធំល្វឹងល្វើយ រមណីយដ្ឋានទន្លេបាទី ក៏មានប្រាសាទចំនួន ២ គឺ ប្រាសាទតាព្រហ្ម និង ប្រាសាទយាយពៅ ដែលជាទីចាប់អារម្មណ៍របស់ភ្ញៀវទេសចរ ។
ប្រាសាទតាព្រហ្ម មានទំហំធំជាងប្រាសាទយាយពៅ ដោយមានកំផែងខាងក្រៅ មានថែវ និង មានប្រាង្គកណ្ដាល ដែលមានទ្វារ ៤ទិស ។ ឯប្រាសាទយាយពៅវិញ មានប្រាង្គតែមួយ ហើយមានទ្វារចេញចូលតែទិសខាងកើតប៉ុណ្ណោះ ។ ប្រាសាទយាយពៅ ស្ថិតនៅប្រហែល ១០០ ម៉ែត្រ ខាងជើង ប្រាសាទតាព្រហ្ម ៕
ដោយ៖ សុថាត់
