កូនភ្នំតូចច្រឡឹងនាទឹកដីព្រៃវែង មានវត្តអារាមដ៏ស្រស់ស្អាត ទេសភាពត្រជាក់ភ្នែក
ស្ថិតនៅភាគខាងកើត នៃព្រះរាជាណាចក្រកម្ពុជា មានចម្ងាយប្រមាណជា ៩០ គីឡូម៉ែត្រ ពីរាជធានីភ្នំពេញ ខេត្តព្រៃវែង មានតែស្រុកមួយប៉ុណ្ណោះ ដែលសម្បូរទៅដោយភ្នំច្រើនជាងគេ នោះគឺស្រុកបាភ្នំ ។
នៅតំបន់ ឃុំជើងភ្នំ និងឃុំឈើកាច់ នៃស្រុកបាភ្នំ មានកម្រងជួរភ្នំ ទាំងធំទាំងតូច សរុបទាំងអស់ ចំនួន ១៤ ភ្នំ ស្ថិតនៅក្បែៗគ្នា និង មានឈ្មោះរៀងៗខ្លួន ដែលចាស់ទុំពីមុនដាក់ឲ្យ ទៅតាមរូបសណ្ឋានរបស់វាដូចជា ភ្នំសំពៅ ភ្នំបាញ់ចារ ភ្នំតូច ភ្នំធំ ភ្នំល្អាង ភ្នំអ្នកតាទូលឈ្នាង និងភ្នំផ្សេងៗទៀត ។
ក្នុងនោះដែរ ស្ថិតនៅចន្លោះ ភូមិមាត់ព្រៃ និងភូមិពោធិ៍អណ្តាត ឃុំជើងគោ ស្រុកបាភ្នំ នាខេត្តព្រៃវែង «ភ្នំតូច» ដែលជាភ្នំមួយ ក្នុងចំណោមភ្នំទាំង ១៤ មានទេសភាពស្រស់ស្អាតណាស់ ដោយមើលពីលើ យើងនឹងឃើញភ្នំផ្សេងៗ និងវាលស្រែលាតសន្ធឹង គួរឱ្យចង់គយគន់ ។
ចាប់ពីចង្កេះភ្នំ ដល់កំពូលភ្នំ មានដើមឈើធំតូច ផ្ដល់ម្លប់ត្រឈឹងត្រឈៃ ដល់អ្នកធ្វើដំណើរឡើងទៅទីនោះ មិនតែប៉ុណ្ណោះ ដើមឡើយ នៅតំបន់នោះ ជាទីតាំងព្រះរាជដំណាក់ព្រះករុណា ព្រះបាទនរោត្តម សីហនុ ព្រះបរមរតនៈកោដ្ឋ ប៉ុន្តែបច្ចុប្បន្ន គេពុំឃើញមានស្លាកស្នាមនៃព្រះរាជដំណាក់នោះទេ ព្រោះសំណង់កសាងពីឈើនោះ ត្រូវបាន បំផ្លាញនៅសម័យកាលប្រល័យពូជសាសន៍ប៉ុល ពត ។
ដើម្បីទៅដល់កំពូលភ្នំ យើងត្រូវឡើងជណ្ដើរប្រមាណជា ១៨០កាំ ត្រូវនឹងប្រវែង ១៥០ម៉ែត្រ ដោយនៅលើកំពូលភ្នំ មានប្រាសាទ និង រូបសត្វតំណាងឆ្នាំទាំង ១២ ដែលសាងសង់ ចាប់ពីគ.ស. ២០០១ ដល់ គ.ស.២០១៩ ចំណាយថវិកាអស់ជិត១លានកន្លះដុល្លារអាមេរិក ដើម្បីឧទ្ទិសចំពោះព្រះពុទ្ធសាសនា វប្បធម៌ ប្រពៃណីខ្មែរ និងទុកជាទីសក្ការៈបូជា ជាកេរ្តិ៍ដំណែលទៅអនាគត និងជាទ្រព្យសម្បតិ្តជាតិ ៕
ប្រភព ៖ Heritages Diary- បេតិកភណ្ឌប្រចាំថ្ងៃ
