រមណីយដ្ឋាន ទំនប់អាងទឹកស្ទឹងស្រែង ២ មានភាពទាក់ទាញបែបនេះផង!

មន្រ្តីទេសចរណ៍ខេត្តឧត្តរមានជ័យ បានឱ្យដឹងថា រមណីយដ្ឋាន ទំនប់អាងទឹកស្ទឹងស្រែង ២ ឬ អាតោដួងចិត្ត កំពុង​ទាក់​​ទាញភ្លៀវទេសចរជាតិ និង អន្តរជាតិច្រើន ដែលបានជួយ​ផ្តល់​ប្រភព​ចំណូល​បន្ថែមដល់​ប្រ​ជា​ពលរដ្ឋនៅទីនោះ ។

ទំនប់អាងទឹកស្ទឹងស្រែង២នេះ ជាបឹងធម្មជាតិដ៏ធំមួយ នៅស្រុកចុងកាល់ ខេត្តឧត្តរ​មានជ័យ បានទាក់ទាញភ្ញៀវជាតិ និង អន្តរជាតិ ទាំងថ្ងៃបុណ្យ ថ្ងៃឈប់សំរាកឬថ្ងៃធម្មតា ជាពិសេសក្នុងថ្ងៃភ្ជុំបិណ្ឌរយៈពេលប៉ុន្មានថ្ងៃកន្លងទៅនេះ មានភ្ញៀវទេសចរទៅកម្សាន្តលេងពី ៤ ០០០ នាក់ទៅ ៥ ០០០ នាក់ចូលទៅទស្សនាក្នុង១ថ្ងៃៗ ។

មូលហេតុ ដែលនាំឱ្យតំបន់ទេសចរណ៍ធម្មជាតិអាតោដួងចិត្តមានភាពទាក់ទាញ ដោយ​សារតំបន់នោះ មានទឹកត្រជាក់ ធ្វើឱ្យប្រជាពលរដ្ឋចង់ងូតទឹកលេងកម្សាន្ត ថែមទាំង​មាន​ខ្យល់អាកាស ល្អបរិសុទ្ធជាប់នឹងជើងភ្នំអាតោនោះផងដែរ។ ​ដោយសារភ្ញៀវទៅលេងទីនោះច្រើន បានធ្វើឱ្យប្រជាពលរដ្ឋ នៅតំបន់នោះ ​មានមុខរប​រ​បន្ថែម ដូចជាបម្រើសេវាកម្មទេសចរណ៍  លក់ម្ហូបអាហារ ដែលបានធ្វើឱ្យពួកគាត់មាន​ជីវភាព​កាន់តែប្រ​សើរឡើងថែមមួយកម្រិតទៀត។

ទំនប់អាងទឹកនេះមានប្រវែង ២ ៨០០ម៉ែត្រ តភ្ជាប់ពី ភ្នំកំបោរ ទៅ ភ្នំរូងដែក មានសមត្ថភាពស្តុកទឹកបាន ២៥៩ លានម៉ែត្រគូប ដែលបានបញ្ចប់ការសាងសង់កាលពី ខែមីនា ឆ្នាំ ២០១៧ ។

ទំនប់នេះស្ថិតនៅក្នុង ភូមិស្រះកែវ ឃុំពង្រ ស្រុកចុងកាល់ ខេត្តឧត្តរមានជ័យ ដែលដើរតួនាទីកាត់បន្ថយទឹកជំនន់ និង អាចផ្តល់ទឹកសម្រាប់យកទៅផ្គត់ផ្គង់ដីស្រែ ជាង ២៥ ០០០ ហិកតា ក្នុងខេត្តចំនួន ៣ ៕

ដោយ៖សុថាត់