មានឥទ្ធិពលមែន! ត្រឹមរូបថត Zhao Liying មួយសន្លឹក ជួយឱ្យអ្នកភូមិមួយនៅចិនរកលុយបានយ៉ាងស្រួល

កាលពីថ្ងៃទី ២៥ ខែកញ្ញា ឆ្នាំ ២០២៤ កន្លងទៅ សារព័ត៌មានចិន Liberation Daily បានចេញផ្សាយថា អ្នកភូមិ Xunpu ក្រុង Quanzhou ខេត្ត Fujian ប្រទេសចិន មានប្រាក់ចំណូលកើនឡើងគួរឱ្យកត់សម្គាល់ក្នុងឆ្នាំ ២០២៣ ដោយភាពជោគជ័យលើសេដ្ឋកិច្ចក្នុងភូមិនេះ គឺទទួលបានដោយសារតែឥទ្ធិពលរូបភាពមួយសន្លឹករបស់តារាសម្ដែងស្រី Zhao Liying។

ជាក់ស្ដែង កាលពីដើមឆ្នាំ ២០២៣ កន្លងទៅ តារាសម្ដែង Zhao Liying បានធ្វើការថតរូបមួយចំនួននៅក្រុង Quanzhou ដោយរូបភាពនោះរួមមានរូបរបស់នាងពាក់បូផ្កាចម្រុះពណ៌លើក្បាលផងដែរ ដោយបូប្រភេទនេះជាអត្តសញ្ញាណប្រពៃណីប្រចាំភូមិស្រុកនោះដោយផ្ទាល់។ រូបភាពមួយសន្លឹកនោះដែរ ទទួលបានការសរសើរខ្លាំងមែនទែនថាមានភាពស្រស់ស្អាតទាក់ទាញរហូតរូបនោះបានក្លាយជារូបដ៏ល្បីល្បាញចែកចាយពាសពេញបណ្ដាញសង្គមនៅក្នុងប្រទេសចិន។

ដោយសារតែភាពល្បីល្បាញនៃរូបភាពរបស់ Zhao Liying ក្នុងការតុបតែងខ្លួនបែបប្រពៃណីភូមិ Xunpu បានជួយឱ្យភូមិមួយនេះផ្លាស់ប្ដូរខុសពីមុនទាំងស្រុង ពីភូមិមួយដែលគ្មានអ្នកចាប់អារម្មណ៍រហូតក្លាយជាទីតាំងកម្សាន្តដ៏ពេញនិយម មនុស្សនាំគ្នាសម្រុកទៅលេង ចង់តុបតែងខ្លួនដូច Zhao Liying ធ្វើឱ្យពលរដ្ឋក្នុងភូមិអាចរកបានប្រាក់ចំណូលក្រាស់ក្រែលពីវិស័យទេសចរណ៍៕

ប្រភព៖ Kenh14