កក់ក្ដៅណាស់! ឃើញយុវជនមកពីខេត្ត អត់មួកអត់កញ្ចក់ សមត្ថកិច្ចនៅស្តុប ២០០៤ ទិញពាក់ឱ្យភ្លាមៗ ទទួលបានការគោរពសរសើរ

មហាជនអ្នកប្រើប្រាស់បណ្ដាញសង្គម​ បាននាំគ្នាផ្ទុះការចាប់អារម្មណ៍ និង ស្ងើចសរសើរព្រោងព្រាត ចំពោះទឹកចិត្តដ៏ល្អប្រពៃរបស់សមត្ថកិច្ចចរាចរណ៍ខណ្ឌពោធិ៍សែនជ័យ ចំណុចស្តុប ២០០៤ ដែលបានទិញមួកសុវត្ថិភាព និង បំពាក់កញ្ចក់ម៉ូតូជូនយុវជនមួយរូប ដែលទំនងជាមកពីខេត្ត ខណៈមកដល់គោលដៅសមត្ថកិច្ចទាំងពុំដឹងថាផ្លូវណាទៅផ្ទះរបស់ខ្លួន។

ទាក់ទិនទៅនឹងរឿងនេះ នៅថ្ងៃទី ២៦ ខែវិច្ឆិកា ឆ្នាំ ២០២៤ តាមរយៈគណនីសមត្ថកិច្ចមួយរូបដែលមានឈ្មោះ Raksmey Keo បានបង្ហោះវីដេអូបង្ហាញពីសកម្មភាព សមត្ថកិច្ចចរាចរណ៍ខណ្ឌពោធិ៍សែនជ័យ ចំណុចស្តុប ២០០៤ ដែលមានទឹកចិត្តដ៏ល្អប្រពៃ ជួយទិញមួកសុវត្ថិភាព បំពាក់កញ្ចក់ម៉ូតូជូន រួមទាំងទិញទឹកឱ្យយុវជនមួយរូប បង្ហាញនូវគំរូដ៏ល្អ រហូតទទួលបានការគោរពស្ងើចសរសើរ និង ត្រូវបានអ្នកប្រើប្រាស់បណ្ដាញសង្គមចែករំលែកបន្តគ្នាព្រោងព្រាត។

តាមរយៈវីដេអូ សមត្ថកិច្ចចិត្តល្អ ក៏បានណែនាំយុវជនកុំឱ្យដោះកញ្ចក់ម៉ូតូដែលបានបំពាក់ជូន ព្រមទាំងបានបញ្ជាក់ថា នៅភ្នំពេញបើជិះឥតមានកញ្ចក់ ឥតមានមួក នឹងត្រូវសមត្ថកិច្ចផាកពិន័យហើយ៕

សូមទស្សនាវីដេអូនៅខាងក្រោម ៖