ក្រុមបាល់ទាត់នារីកម្ពុជា មិនអាចបន្តទៅវគ្គផ្ដាច់ព្រ័ត្រ ក្រោយចាញ់ក្រុមជម្រើសជាតិវៀតណាមក្នុងលទ្ធផល ៤-០

នៅថ្ងៃទី ១២ ខែឧសភា ឆ្នាំ ២០២៣ នេះ ក្រុមបាល់ទាត់ជម្រើសជាតិនារីកម្ពុជា បានប្រកួតជាមួយក្រុមជម្រើសជាតិនារីវៀតណាម នៅវគ្គពាក់កណ្ដាលផ្ដាច់ព្រ័ត្រក្នុងព្រឹត្តិការណ៍កីឡាស៊ីហ្គេម លើកទី ៣២ ឆ្នាំ ២០២៣ នៅពហុកីឡដ្ឋានជាតិអូឡាំពិក។

យ៉ាងណាមិញ មុនបានមកដល់វគ្គពាក់កណ្ដាលផ្ដាច់ព្រ័ត្រនេះ ក្រុមបាល់ទាត់នារីកម្ពុជាបានប្រកួតឈ្នះក្រុមនារីឡាវ ២-០, ឈ្នះសិង្ហបុរី ១-០ និង បានចាញ់ក្រុមនារីថៃ ០-៣ ដោយឈរចំណាត់ថ្នាក់លេខ ២ ក្នុងតារាងពូល ២ ខណៈដែលក្រុមនារីវៀតណាម ឈរចំណាត់ថ្នាក់លេខ ១ ក្នុងតារាងពូល A ដោយបានឈ្នះក្រុមនារីម៉ាឡេស៊ី ៣-០, ឈ្នះក្រុមនារីមីយ៉ាន់ម៉ា ៣-១ និង ចាញ់ហ្វីលីពីន ១-២។

ដោយឡែក ក្នុងជំនួបជាមួយក្រុមជម្រើសជាតិវៀតណាមយប់នេះ ឃើញថាកីឡាការិនីបាល់ទាត់របស់កម្ពុជាយើង បានបញ្ចេញអស់ពីសមត្ថភាពមែនទែន មិនធ្វើឱ្យមហាជនអ្នកគាំទ្រដែលទៅទស្សនាដោយផ្ទាល់ ឬ នៅតាមគេហដ្ឋាន មានការខកចិត្តនោះឡើយ បើទោះបីជាក្រុមជម្រើសជាតិយើងមិនអាចបន្តទៅវគ្គផ្ដាច់ព្រ័ត្រដណ្ដើមមេដាយមាសក៏ពិតមែន ក្រោយចាញ់ក្រុមជម្រើសជាតិវៀតណាមក្នុងលទ្ធផល ៤ ទល់នឹង ០៕