កាន់តែជោគជ័យ ស្រីស្អាត វ៉ាន់ វល័ក្ខ កាន់តែមិនខ្វល់រឿងបេះដូង ដើរចាយជីវិតនៅលីវឯក្រៅប្រទេសយ៉ាងរំភើយ

និយាយពីកញ្ញា វ៉ាន់ វល័ក្ខ ត្រូវបានមហាជនចាត់ទុកជាតារាសម្ដែងស្រីចូលចិត្តតុបតែងខ្លួនបែបសិចស៊ីតាមបែបនារីសម័យថ្មីមួយរូប ដោយសារស្រីស្អាតរូបនេះ មានដងខ្លួនតូចស្រឡូន សាច់សខ្ចី មុខមាត់ទាក់ទាញមានមន្តស្នេហ៍មិនខ្លាចនឹងបង្ហាញទៅដល់មហាជនឡើយ។

ប៉ុន្មានឆ្នាំចុងក្រោយនេះ ស្របពេលសិល្បៈកាន់តែមានទីផ្សារជោគជ័យ គេឃើញថាជីវិតឯកជនរបស់តារាសម្ដែងស្រីសិចស៊ី វ៉ាន់ វល័ក្ខ ហាក់កាន់តែហាយសូរ រស់នៅបែបនារីអភិជនគួរឱ្យកត់សម្គាល់ជាមួយនឹងការប្រើប្រាស់របស់របរម៉ាកល្បីៗ ជិះសុទ្ធតែរថយន្តទំនើបតម្លៃរាប់ម៉ឺនដុល្លារ រស់នៅក្នុងផ្ទះវីឡាដ៏ធំស្កឹមស្កៃតម្លៃរាប់ម៉ឺនដុល្លារទៀតផង។

ខណៈជីវិតរបស់ វ៉ាន់ វល័ក្ខ មានអ្វីៗគ្រប់យ៉ាងហើយ បើចាប់អារម្មណ៍រឿងរ៉ាវជីវិតស្នេហារបស់នាងវិញ ឃើញថាតារាស្រីរូបនេះ ហាក់ពុំទាន់ចង់គិតរឿងជីវិតគូឡើយ ដោយមិនដែលឃើញនាងបង្ហាញទំនាក់ទំនងស្នេហាជាមួយបុរសរូបណាឡើយ ដែលកំពុងដើរចាយជីវិតយ៉ាងរីករាយ និង ហាយសូរជាមួយភាពនៅលីវរបស់នាង។

ជាក់ស្ដែង ថ្មីៗនេះ តារាស្រីរូបស្រស់នេះ កាន់តែធ្វើឱ្យអ្នកគាំទ្រចាប់អារម្មណ៍ពីជីវិតឯកជនរបស់នាង ខណៈជិតដាច់ឆ្នាំក៏បានឃើញនាងបង្ហាញសកម្មភាពធ្វើដំណើរកម្សាន្តទៅកាន់ប្រទេសចិន ដើរចាយជីវិតយ៉ាងហាយសូរផ្ដិតយករូបភាពស្អាតៗយ៉ាងរីករាយ៕