(វីដេអូ) បះរោមខ្ញាក! នៅផ្ទះម្នាក់ឯងថតវីដេអូរាំដាក់ TikTok មានអីឃើញស្រមោលស្ទុងៗអើត-កតាមជណ្ដើរ
រឿងរ៉ាវរបស់អ្នកលេងបណ្ដាញសង្គម TikTok ម្នាក់ មានគណនីឈ្មោះ @reu_music កំពុងធ្វើឱ្យមហាជនជាច្រើន ព្រឺសម្បុរគ្រប់់គ្នា ក្រោយពួកគេចាប់អារម្មណ៍ទៅលើអ្វីម្យ៉ាងគួរឱ្យខ្លាចនៅកាំជណ្ដើរខាងក្រោយក្នុងវីដេអូដែលលោកបានបង្ហោះ។
ក្នុងវីដេអូនោះ បានបង្ហាញឱ្យឃើញបុរសជាម្ចាស់គណនីខាងលើ កំពុងតែរាំតាមបទ «Say So» របស់តារាស្រី Doja Cat ប៉ុន្តែកាយវិការរាំរបស់លោក មិនមែនជាអ្វីដែលធ្វើឱ្យមហាជនចាប់អារម្មណ៍ខ្លាំងនោះឡើយ តែជាអ្វីម្យ៉ាងនៅលើជណ្ដើរដែលទាក់ភ្នែករបស់ពួកគេ។ បើតាមការសង្កេតមើលឱ្យជាក់ ខណៈអ្នកលេង TikTok រូបនោះកំពុងបញ្ចេញក្បាច់រាំ ក៏ឃើញមានវត្តមានស្រមោលអ្វីចម្លែកលេចអើតក្បាលមកតាមកាំជណ្ដើរគួរឱ្យខ្លាច។
ក្រោយមានមហាជនចាប់អារម្មណ៍ទៅលើរឿងព្រឺសម្បុរនៅពីក្រោយខ្នងលោកបែបនេះ ម្ចាស់គណនី TikTok រូបនោះបានថ្លែងប្រាប់សារព័ត៌មាន Unilad ថា គ្រាន់តែមហាជនចាប់អារម្មណ៍ភ្លាម លោកក៏ចាប់បារម្ភភ្លែត ដោយគិតថាអ្វីដែលគ្រប់គ្នាបានឃើញ អាចជាមនុស្ស តែមិនមែនជាព្រលឹងវិញ្ញាណអ្វីនោះឡើយ។ តែយ៉ាងណា ក្រោយធ្វើការពិនិត្យឱ្យដិតដល់ជាមួយក្រុមគ្រួសារលោក គឺច្បាស់ជាក់ថា នៅទីនោះគឺគ្មានកន្លែងណាដែលអាចឱ្យមនុស្សលាក់ពួនបានឡើយ។
យ៉ាងណាមិញ លោកក៏បានលើកឡើងទៀតថា ទោះអ្វីដែលឃើញជាអមនុស្សពិតមែន ក៏លោកមិនមានការភ័យខ្លាចអ្វីនោះដែរ ព្រោះថាក្នុងផ្ទះនោះ លោកធ្លាប់ជួបរឿងហេតុព្រលឹងវិញ្ញាណនេះច្រើនដងហើយ៕
