លោក Nawat ប្រាប់ឱ្យមហាជនថៃកុំបំភ្លេច ពេជ្រ វត្តីសារ៉ាវឌ្ឍី ព្រោះនាងមានចំណុចពិសេសទាំងអស់នេះ
មកទល់ពេលនេះ ស្ថាប័ន MGI ដែលគ្រប់គ្រងដោយលោក Nawat Itsaragrisil ហាក់កាន់តែផ្ទុះការគាំទ្រពីមហាជនពីមួយឆ្នាំទៅមួយឆ្នាំ។ ពិសេស សម្រាប់ឆ្នាំ ២០២២ នេះកាន់តែលេចធ្លោខ្លាំង បន្ទាប់ពីកម្មវិធីកញ្ញាឯកដ៏អស្ចារ្យលំដាប់ថ្នាក់អន្ដរជាតិ ដែលប្រារព្ធឡើងនៅប្រទេសឥណ្ឌូនេស៊ី សម្រាប់ឆ្នាំ ២០២២ នេះ បានជ្រើសរើសជ័យលាភីគ្រងមកុដលេខ ១ និង បវរកញ្ញាលំដាប់រងទាំង ៩ នាក់រួចមក។
លើសពីនេះទៅទៀត អ្វីដែលសំខាន់ ខណៈបវរកញ្ញា Top 10 ទាំង ១០ រូបបានទៅដល់ប្រទេសថៃហើយគឺ ស្ថិតក្រោមការគ្រប់គ្រង និង មើលថែយ៉ាងកក់ក្តៅពីលោក Nawat Itsaragrisil ទាំងអស់ផងដែរ។ ពិសេស ស្រីស្អាតជ័យលាភីទាំង ១០ រូប ក៏បានចុះបញ្ជីការងារជាមួយស្ថាបនិក MGI រួចរាល់ហើយដូចគ្នា។
ទន្ទឹមនឹងការមើលថែយ៉ាងកក់ក្តៅទៅលើបវរកញ្ញានេះដែរ ស្រាប់តែថ្មីៗនេះលោក Nawat Itsaragrisil ស្ថាបនិក MGI បានទម្លាយអារម្មណ៍ចំពោះ ពេជ្រ វត្តីសារ៉ាវឌ្ឍី MGC 2022 ប្រាប់ដល់អ្នកគាំទ្រនៅប្រទេសថៃ ៖ «ពេជ្រ វត្តីសារ៉ាវឌ្ឍី ជាមនុស្សម្នាក់ដែលតែងតែផ្តល់កម្លាំងចិត្តដល់ Engfa លំដាប់រងទី ១ MGI 2022 គ្រប់ពេល ខណៈកំពុងប្រកួត Miss Grand International 2022 នៅប្រទេសឥណ្ឌូនេស៊ី រហូតធ្វើឱ្យ Engfa អាចឆ្លងកាត់ឧបសគ្គ មានស្នាមញញឹមឡើងមកវិញ ដូច្នេះសូមអ្នកទាំងអស់គ្នាកុំភ្លេច ពេជ្រ វត្តីសារ៉ាវឌ្ឍី ណ៎ា! ពេជ្រ វត្តីសារ៉ាវឌ្ឍី នាងមិនបានចូលមកដណ្តើមក្តីស្រឡាញ់ពីអ្នកណាឡើយ តែ ពេជ្រ វត្តីសារ៉ាវឌ្ឍី ជាផ្នែកមួយដែលធ្វើឱ្យស្ថានការណ៍ដែលកំពុងតែយ៉ាប់មានភាពល្អប្រសើរឡើងទៅវិញទេ អ៊ីចឹងហើយ សូមឱ្យអ្នកទាំងអស់គ្នាចូលទៅផ្តល់កម្លាំងចិត្តដល់ ពេជ្រ វត្តីសារ៉ាវឌ្ឍី ផង»៕
