ភ្ញាក់ផ្អើល! IU ទម្លាយពីស្ថានភាពជំងឺរបស់ខ្លួនមួយ ក្នុងកម្មវិធីការប្រគុំតន្ត្រី ធ្វើឱ្យអ្នកគាំទ្របារម្ហខ្លាំង

តារាស្រីមុខផ្អែមមានស្នេហ៍ IU ជារឿយៗតែងតែស្អំបេះដូងមហាជនអ្នកគាំទ្រជាច្រើន ឱ្យបាក់ធ្លាក់អន្លង់ស្នេហ៍ពិបាករកផ្លូវចេញ តាមរយៈសម្រស់ដ៏ស្រស់ស្រទន់ ជាមួយនឹងសមត្ថភាពសិល្បៈដ៏សម្បូរបែប ជាពិសេសគឺទឹកចិត្តល្អសប្បុរសធម៌របស់នាងដែលតែងតែជួយអ្នកដទៃនោះ។

យ៉ាងណាមិញ ស្រីស្រស់ IU ទើបតែត្រលប់មកវិញជាមួយការប្រគុំតន្ត្រីប្រចាំឆ្នាំរបស់ខ្លួនមួយ មានឈ្មោះថា Golden Hour ដែលបានប្រព្រឹត្តទៅកាលពីថ្ងៃទី ១៨ ខែកញ្ញា ឆ្នាំ ២០២២ កន្លងទៅនេះ នាទីក្រុងសេអ៊ូលផ្ទាល់។

បរិយាកាសនៅក្នុងការប្រគុំតន្រ្តីនេះ គឺពិតជាគួរឱ្យរំជើបរំជួលចិត្តខ្លាំងណាស់ ព្រោះមានការចូលរួមពីសំណាក់មហាជនអ្នកគាំទ្រជាច្រើនកុះករមិនសល់សំបុត្រ ឬ កៅអីឱ្យទំនេរមួយឡើយ សូម្បីតែតារាល្បីៗក៏មានវត្តមាននៅក្នុងនេះដូចគ្នា។

ក្នុងនោះ បន្ទាប់ពីបានសម្តែងរួចរាល់ IU ក៏ស្រាប់តែទម្លាយទៅកាន់មហាជនអ្នកគាំទ្រ ការសម្តែងរបស់នាងនៅក្នុងថ្ងៃនេះ ហាក់ពិបាកបន្តិច ដោយនាងមានបញ្ហាជាមួយនឹងត្រចៀក ដែលធ្វើឱ្យឡើងសម្តែងទាំងមិនសូវមានទំនុកចិត្ត និងភ័យមិនតិចឡើយ។

នាងបន្តទៀតថា បញ្ហាត្រចៀករបស់នាងមិនសូវជាធ្ងន់ធ្ងរប៉ុន្មាននោះទេ ហើយវាក៏បានកើតឡើងជាងមួយឆ្នាំមកហើយ។ ក្រោយពីបានសម្តែងចំនួនប៉ុន្មានថ្ងៃនេះ បំពង់ករបស់នាងហាក់មិនអីឡើយ តែចំណែកត្រចៀកបែរជាមិនសូវដំណើរការល្អឡើយ​ ទើបធ្វើឱ្យនាងឡើងសម្តែងនៅថ្ងៃបន្តទាំងមិនដឹងថានឹងមានរឿងអ្វីកើតឡើង ប៉ុន្តែចុងក្រោយវាក៏បានដំណើរការទៅដោយល្អ។

យ៉ាងណាមិញ មហាជនអ្នកគាំទ្រពិតជាបារម្ភមិនតិចនោះទេ ម្នាក់ៗស្រុះដៃស្រុះជើងជូនពរឱ្យនាងឆាប់ជាសះស្បើយពីអាការមួយនេះផងដែរ៕