ស្ងាត់ៗ ហ្សូណូ ប្រកាសថាខ្លួនគឺជាតារាចម្រៀងឯករាជ្យ មិនជ្រកក្រោមផលិតកម្មណាទៀតទេ

និយាយពីតារាចម្រៀងប្រុសលោក ហ្សូណូ មហាជនអ្នកគាំទ្រវិស័យចម្រៀងបានជ្រាបហើយថាលោកជាតារាចម្រៀងដ៏មានប្រជាប្រិយភាពមួយរូបប្រចាំផលិតកម្មរស្មីហង្សមាសជាច្រើនឆ្នាំកន្លងមក ដោយមានស្នាដៃចម្រៀងល្បីៗជាច្រើនផងដែរ។

យ៉ាងណាមិញ ក្រៅពីបានសាងស្នាដៃចម្រៀងជាច្រើនបម្រើអារម្មណ៍អ្នកគាំទ្រ តារាចម្រៀងប្រុស ហ្សូណូ អាចចាត់ទុកជាតារាចម្រៀងប្រុសមានសមត្ថភាពខ្ពស់ក្នុងវិស័យចម្រៀងនេះ អាចក្ដោបបានឱកាសធ្វើជាគណៈកម្មការក្នុងកម្មវិធីប្រឡងចម្រៀងលំដាប់ពិភពលោករបស់ស្ថានីយទូរទស្សន៍រស្មីហង្សមាសទៀតផង។

មកដល់បច្ចុប្បន្ននេះ ដ្បិតតែតារាចម្រៀងប្រុសល្បីឈ្មោះ ហ្សូណូ មិនសូវបង្ហាញស្នាដៃចម្រៀងថ្មីៗច្រើនដូចមុនក្នុងផលិតកម្ម ប៉ុន្តែគេសង្កេតឃើញថាមួយរយៈថ្មីនេះ លោកក៏កំពុងក្ដោបបានទីផ្សារខ្លាំងតាមរយៈការអញ្ជើញច្រៀងក្នុងកម្មវិធីតូចធំ និងតាមបណ្ដា Club, Pub ផ្សេងៗ។

ដោយឡែក អ្វីដែលធ្វើឱ្យមហាជនអ្នកគាំទ្រកំពុងចាប់ភ្លឹក និង ហាក់ផ្អើលខ្លាំង ក្រោយពីក្រឡេកទៅមើលហ្វេសប៊ុកផេកផ្លូវការរបស់តារាចម្រៀងរូបនេះ បានសរសេរដាក់លើផេករបស់ខ្លួនឱ្យដឹងថាពេលនេះលោកបានក្លាយជាតារាចម្រៀងឯករាជ្យហើយ ដោយពុំមែនជាតារាចម្រៀងនៅក្រោមផលិតកម្មណាមួយទៀតឡើយ៕