(វីដេអូ) ក្នុងរាត្រីផ្ទេរមកុដ ជូរី ល្អហួស រំជួលចិត្តរហូតស្រក់ទឹកភ្នែកពោលរឭកដឹងគុណចំពោះលោកប៉ា ទោះមិនធ្លាប់បង្ហាញមុខកន្លងមកក៏ដោយ

ពិតណាស់ នៅរាត្រីថ្ងៃទី ២២ ខែធ្នូ ឆ្នាំ ២០២៤ នេះ កម្មវិធីប្រកួតសម្រស់វ័យក្មេង Miss Preteen International Cambodia បានឈានដល់វគ្គប្រកួតផ្ដាច់ព្រ័ត្រ និង រកឃើញម្ចាស់ជ័យលាភីគ្រងមកុដ Miss Preteen International Cambodia ប្រចាំឆ្នាំ ២០២៤ ហើយក៏ជាពេលវេលាដែលបវរកញ្ញាយុវតី ជូរី ល្អហួស Miss Preteen International Cambodia 2023 ធ្វើការផ្ទេរមកុដបំពាក់ឱ្យម្ចាស់គ្រងមកុដថ្មី ស្ងួន កវីម៉ូនីកា។

ក្រោយពី ជូរី ល្អហួស បំពេញតួនាទីជារាជិនីគ្រងមកុដវ័យក្មេង Miss Preteen International Cambodia ប្រចាំឆ្នាំ ២០២៣ រយៈពេលមួយឆ្នាំកន្លងមកនេះ និង បានផ្ទេរតំណែងឱ្យម្ចាស់ជ័យលាភីថ្មីនេះដែរ ក្រឡេកមើលលើបណ្ដាញសង្គមអ្នកគាំទ្រវិស័យបវរកញ្ញាវ័យក្មេង ក៏ដូចជាអ្នកសិល្បៈជាច្រើន បានបង្ហោះសារបង្ហាញនូវក្ដីស្រឡាញ់ ក៏ដូចជាការចង់ចាំដ៏ល្អៗចំពោះបវរកញ្ញាយុវតីរូបនេះ។

លើសពីនេះ លើបណ្ដាញសង្គមមហាជនអ្នកគាំទ្រក៏បានធ្វើការចែករំលែកនូវរូបភាព ក៏ដូចជាវីដេអូនៃការដើរបង្ហាញខ្លួនរបស់ ជូរី ល្អហួស ព្រមទាំងសកម្មភាពនៃការផ្ទេរមកុដ ដោយបានសរសើរពីភាពលេចធ្លោរបស់នាង សម្រស់ស្រស់ស្អាតខ្លាំងក្នុងរាត្រីផ្ទេរមកុដយប់មិញ។

អ្វីដែលកាន់តែចាប់អារម្មណ៍ និង សរសើរពីបវរកញ្ញយុវតី ល្អហួស ក្នុងវគ្គឡើងបង្ហាញចំណាប់អារម្មណ៍ចុងក្រោយមុនផ្ទេរមកុដ នាងក៏បានថ្លែងអំណរគុណដល់បុគ្គលសំខាន់ជាច្រើននៅពីក្រោយភាពជោគជ័យរបស់ខ្លួន ជាពិសេសក៏ឃើញនាងទម្លាយអារម្មណ៍យ៉ាងរំជួលចិត្តនិយាយទាំងទឹកភ្នែកពោលអរគុណទៅកាន់លោកប៉ាជាទីស្រឡាញ់ ដ្បិតតែមិនធ្លាប់បង្ហាញ មិនបានជួបមុខ និង មិនបានឃើញលោកក្នុងវេទិកានេះ តែនាងក៏បានបង្ហាញក្ដីគោរពស្រឡាញ់ ដឹងគុណដល់លោកប៉ា​ ចំពោះការព្រួយបារម្ភយកចិត្តទុកដាក់ សួរសុខទុក្ខនាងពីចម្ងាយរហូតកន្លងមក៕

សូមចុចទីនេះដើម្បីទស្សនាវីដេអូ៖