បង្ហាញបុរសម្នាក់នៅពីក្រោយបទចម្រៀងដ៏អស្ចារ្យ ក្នុងការប្រកួត The Voice Cambodia វគ្គផ្សាយផ្ទាល់សប្តាហ៍ទី ១

នៅថ្ងៃទី ២៧ ខែសីហា ឆ្នាំ ២០២៣ កន្លងទៅនេះ កម្មវិធី The Voice Cambodia រដូវកាលទី ៣ បានឈានមកដល់វគ្គ Live Show សប្តាហ៍ទី ១ ហើយ។ ក្នុងនោះ បេក្ខភាព ១២ រូប ក្នុងចំណោម ២៤ រូប បានបង្ហាញវត្តមានដ៏មានទេពកោសល្យនៅក្នុងសប្តាហ៍ទី ១ នោះយ៉ាងទាក់ទាញ ដោយបទចម្រៀងរបស់បេក្ខភាពដែលលើកយកមកបកស្រាយគឺបានសម្រិតសម្រាំងយ៉ាងយកចិត្តទុកដាក់ពីការបង្វឹករបស់ Coach ទាំង ៤ និង ការកែច្នៃសាច់ភ្លេងមួយបែបថ្មីពីលោកគ្រូភ្លេងដ៏ជំនាញប្រចាំផលិតកម្មរស្មីហង្សមាស។

បើក្រឡេកមកមើលពីក្រោយនៃការកែសម្រួលលើចង្វាក់ភ្លេងរបស់បេក្ខភាពទាំង ១២ រូប ក្នុងវគ្គ Live Show សប្តាហ៍ទី ១ វិញគឺជាថ្វីដៃរបស់លោកគ្រូភ្លេង សាន សុវណ្ណឌីន ដែលជាតន្ត្រីករមានទេពកោសល្យ និង សមត្ថភាពយ៉ាងច្រើនក្នុងវិស័យតន្ត្រីនេះ។

ម្យ៉ាងវិញទៀត លោកគ្រូភ្លេង សាន សុវណ្ណឌីន ក៏ធ្លាប់ជាសមាជិកក្រុមចម្រៀងរ៉ក ដែលមានការគាំទ្រយ៉ាងខ្លាំងកាលពីប៉ុន្មានឆ្នាំមុន គឺក្រុម «Cartoon Emo» ដែលគេនៅចាំថាមានតារាចម្រៀង Original លោក Noly ជាសមាជិកក្នុងក្រុមចម្រៀងនោះដែរ។

គួរឱ្យដឹងដែរថា លោកគ្រូ សាន សុវណ្ណឌីន មិនត្រឹមតែបានកែសម្រួលលើសាច់ភ្លេងនៃបទចម្រៀងរបស់បេក្ខភាពក្នុងកម្មវិធី The Voice Cambodia នោះទេ តែលោកគ្រូក៏ជាបុគ្គលនៅពីក្រោយទស្សនីយភាពដ៏អស្ចារ្យនៃការច្រៀងរបស់កម្មវិធីប្រកួតចម្រៀងជាច្រើននៃស្ថានីយទូរទស្សន៍ហង្សមាសផងដែរ៕