ទើបបង្ហាញមុខសង្សារសោះ ពេលនេះ Punjan ធ្វើឱ្យមហាជនលើសជាតិស្ករ ក្នុងថ្ងៃខួប ៣៧ ឆ្នាំ

កាលពីថ្ងៃទី ១២ ខែកក្កដា ឆ្នាំ ២០២៣ កន្លងទៅនេះ បានធ្វើឱ្យមហាជនអ្នកលេងបណ្ដាញសង្គមអ៊ីនស្តាក្រាម និង អ្នកគាំទ្រតារាប្រុស Punjan Prama មានការរំភើបចិត្ត បន្ទាប់ពីអ្នកកំលោះរូបនេះសម្រេចចិត្តបើកបង្ហាញមុខគូស្នេហ៍ថ្មីជាសាធារណៈ ក្រោយពីគ្រាំគ្រាបេះដូងមករយៈពេល ១ ឆ្នាំ។ នារីដែលជាសង្សារបណ្ដូលចិត្តរបស់កំលោះ Punjan Prama មានឈ្មោះថា «Jomi» ដែលមានគណនី IG ឈ្មោះថា «Jomiwsvn»។

បន្ទាប់ពីប្រកាសមានទំនាក់ទំនងគ្នាជាសាធារណៈមក តារាប្រុស Punjan តែងបានបង្ហោះរូបភាពស្និទ្ធស្នាលជាមួយនឹងស្រីស្រស់ Jomi ពុំដែលដាច់ឡើយ។ តួយ៉ាង កាលពីថ្ងៃខួបកំណើតអាយុ ៣៧ ឆ្នាំកន្លងទៅ គេស្រាប់តែឃើញប្រុសសង្ហា Punjan កាន់ដៃសង្សារធ្វើពិធីឆ្លងខួបយ៉ាងរ៉ូមែនទិក និង ផ្អែមល្ហែម ដែលរូបភាពទាំងនេះអ្នកគាំទ្រខានឃើញមកជាយូរហើយ។

ងាកទៅមើលស្រីស្អាត Jomi វិញ ខណៈដែលខួបកំណើតសង្សារបណ្ដូលចិត្តដូចនោះ នាងក៏បានទិញនំខេក Surprise ថែមទាំងបង្ហោះរូបភាពជូនពរយ៉ាងផ្អែមផងដែរថា ៖ «រីករាយថ្ងៃកំណើតបងសម្លាញ់»។ ទន្ទឹមនឹងឃើញដូចនោះ គេឃើញថាមហាជនចូលទៅបញ្ចេញមតិជូនពរព្រោងព្រាត ហើយ សង្ឃឹមថាស្នេហាតារាប្រុស Panjan នឹងអាចកាន់ដៃគ្នាចូលរោងការ៕