ជូនពរម្នាក់ ១ មក! ឆន ស្រីណេត ចេញទៅប្រកួត Miss Tourism International នៅម៉ាឡេស៊ីថ្ងៃនេះហើយ

អ្នកគាំទ្រវិស័យបវរកញ្ញាសុទ្ធសឹងតែបានជ្រាបហើយពី កញ្ញា ឆន ស្រីណេត ជាម្ចាស់ជ័យលាភីលំដាប់រងទី ១ នៃកម្មវិធីប្រកួតសម្រស់ Miss Universe Cambodia ២០២១ កាលពីកន្លងទៅនេះ។

បើទោះបីជា ឆន ស្រីណេត មិនបានក្លាយជាម្ចាស់ជ័យលាភីគ្រងមកុដមែន ប៉ុន្តែនាងបានក្លាយជានារីមួយរូបដ៏លេចធ្លោក្នុងចិត្តមហាជនជាច្រើន ដែលមានទាំងសមត្ថភាព ឆ្លាត និង រូបសម្រស់ស្រស់ស្អាតទាក់ទាញ ដែលធ្វើឱ្យមហាជនមានការចាប់អារម្មណ៍គាំទ្រ និង ស្រឡាញ់ពេញចិត្តរូបនាងជាខ្លាំង។

យ៉ាងណាមិញ ថ្មីៗកន្លងទៅ ឆន ស្រីណេត ក៏ទទួលបានឱកាសក្លាយជាម្ចាស់មកុដ Miss Tourism International Cambodia ២០២២ នឹងតម្រូវឱ្យបវរកញ្ញារូបនេះត្រៀមខ្លួនតំណាងឱ្យកម្ពុជាចូលរួមប្រកួតលើឆាកអន្តរជាតិ Miss Tourism International ២០២២ លើកទី ២៥។

ដោយឡែក មកដល់ព្រឹកថ្ងៃទី ១០ ខែវិច្ឆិកា ឆ្នាំ ២០២២ នេះ ឆន ស្រីណេត ក៏បានឡើងយន្តហោះធ្វើដំណើរទៅប្រទេសម៉ាឡេស៊ី ដើម្បីចូលរួមប្រកួត Miss Tourism International ២០២២ ហើយ ដែលឃើញថាមានវត្តមានបងប្អូន សាច់ញាតិ បានធ្វើការជូនដំណើរ និង ជូនពរដល់នាងផងដែរ។

ក្រឡេកទៅមើល មហាជនក៏ដូចជាអ្នកគាំទ្រវិស័យបវរកញ្ញាជាច្រើន ក៏កំពុងតែធ្វើការជូនពរ និង ផ្ដល់កម្លាំងដល់បវរកញ្ញារូបនេះ ឱ្យទទួលបានជោគជ័យលើឆាកអន្តរជាតិមួយនេះផងដែរ៕