ផ្អែមណាស់! ធ្លាយសកម្មភាពឃ្យូតៗក្រោយឆាក ដែល Junho តែងធ្វើដាក់ YoonA

ស្រីស្អាត YoonA កំពូលតារាចម្រៀងស្រីប្រចាំក្រុម SNSD និង កំលោះសង្ហា Junho សមាជិកក្រុមចម្រៀង 2PMពួកគេមិនត្រឹមតែមានសមត្ថភាពខ្លាំងត្រឹមក្នុងវិស័យចម្រៀងតែប៉ុណ្ណោះទេ សូម្បីតែក្នុងវិស័យសម្ដែងក៏​អ្នកទាំង ២ មានទេពកោសល្យខ្លាំង ព្រមទាំងទទួលបានការគាំទ្រយ៉ាងក្រាស់ក្រែលពីមហាជនអ្នកគាំទ្រផងដែរ។

ស្របពេលឥឡូវនេះ រឿងភាគរបស់អ្នកទាំងពីរដែលមានចំណងជើងថា «King The Land»​ កំពុងតែផ្ទុះល្បីកក្រើកជាខ្លាំង ដែលតួសម្ដែងទាំងពីរសម្ដែងយ៉ាងល្អ និង សមគ្នាជាពន់ពេករហូតធ្វើឱ្យអ្នកគាំទ្រជាច្រើនផ្គូផ្គង ព្រមទាំងចង់ឱ្យអ្នកទាំងពីរស្រឡាញ់គ្នានៅក្នុងជីវិតផងដែរ។

យ៉ាងណាមិញ កាលពីដើមខែកក្កដា ឆ្នាំ​ ២០២៣ កន្លងទៅ សារព័ត៌មានក្នុងប្រទេសកូរ៉េបានចេញផ្សាយថា តារាស្រីប្រុសទាំងពីរនេះកំពុងមានទំនាក់ទំនងស្នេហាជាមួយគ្នា។ ដោយឡែក បន្ទាប់មកក៏ខាងផលិតកម្មអ្នកទាំងពីរចេញមុខបកស្រាយថា នេះជាព័ត៌មានមិនពិតនោះឡើយ ដែលបានធ្វើឱ្យអ្នកគាំទ្រពួកគេទាំងពីរមិនតិចនោះទេ មានការស្រងាកចិត្តជាខ្លាំង។

ជាមួយគ្នានោះ យោងតាមប្រភពជិតស្និទ្ធមួយរូបដែលអះអាងថាជាបុគ្គលិកនៃក្រុមការងារផលិតរឿង «King The Land»​ បានបង្ហើបចូលទៅក្នុងបណ្ដាញសង្គមអ៊ីនធឺណេតថា ៖ «Lee Junho តែងយកម្ហូបអាហារមកកន្លែងថតសម្រាប់ YoonA ជារឿយៗកំឡុងពេលដែលពួកគេថតរឿង។ មិនតែប៉ុណ្ណោះពួកគេក៏មានទំនាក់ទំនងល្អ តែងលេងសើចជាមួយគ្នានៅពេលសម្រាក ហើយមានភាពស្និទ្ធស្នាលគួរឱ្យកត់សម្គាល់»៕