ច្រណែនណាស់! នារីខ្មែរម្នាក់រំភើបខ្លាំង ក្រោយបានថតរូបយ៉ាងស្និទ្ធស្នាលជាមួយតារាកូរ៉េដ៏ល្បី Han Sohee

Han Sohee គឺជាកំពូលតារាសម្ដែងស្រីកូរ៉េមួយរូប កំពុងទទួលបានការគាំទ្រយ៉ាងខ្លាំងពីមហាជន ជាពិសេសគឺនៅក្នុងស្រទាប់យុវវ័យផ្ទាល់តែម្ដង។ ប្រជាប្រិយភាពរបស់នាងផ្ទុះឡើងជាខ្លាំ​ង ចាប់តាំងពីក្រោយនាងបានសម្ដែងរឿងមានចំណងជើងថា «Nevertheless» ដែលបានចាក់បញ្ចាំងចប់កាលពីឆ្នាំ ២០២១ កន្លងទៅ។

ជាមួយសន្ទុះប្រជាប្រិយភាព កំពុងហក់ឡើងខ្លាំង ស្រាប់តែកាលពីថ្ងៃទី ៧ ខែកក្កដា ឆ្នាំ​ ២០២៣ កន្លងទៅនេះ មានអ្នកគាំទ្រម្នាក់របស់តារាសម្ដែងស្រី Han Sohee ដែលជាជនជាតិខ្មែរ កំពុងបន្តការសិក្សានៅទីក្រុងប៉ារីស ប្រទេសបារាំង បានជួបតារាស្រីសំណព្វរបស់ខ្លួនដោយចៃដន្យ ព្រមទាំងបានចែករំលែកចូលទៅក្នុងបណ្ដាញសង្គម Twitter ធ្វើឱ្យអ្នកគាំទ្រជាច្រើនផ្សេងទៀតច្រណែនជាខ្លាំង។

ក្នុងការបង្ហោះដោយគណនីឈ្មោះថា @ssarahthun បានរៀបរាប់ទាំងរំភើបថា ៖ «នាងបានឈរនិយាយគ្នាលេងជាមួយនឹង Han Sohee ប្រមាណជា ៥ នាទីនៅឯប៉ារីស»។ មិនតែប៉ុណ្ណោះ តារាស្រីរូបនេះក៏បាននិយាយប្រាប់ទៅកាន់ ម្ចាស់គណនីវិញថា ៖ «នាងពិតជារំភើបហើយក៏មានអារម្មណ៍ថាភ័យផងដែរ ដោយសារតែ MV បទថ្មីរបស់ Jungkook សមាជិកកូនពៅ BTS នឹងចេញនៅសប្ដាហ៍ក្រោយ»៕